«Putinin «Münhen nitqi» o zaman böyük rezonans doğursa da, Qərb dünyası Kremlin geosiyasi ambisiyalarını ciddiyə almadı. Fəqət, hadisələr göstərdi ki, Putin yalnız quru sözlərlə kifayətlənmək fikrində olmayıb, tərsinə, həqiqətən də mövcud kursa müvafiq düzəlişlər eləmək üçün ambisiyalarını və resurslarını artırıb.

Doğrudan da, çox gözləmək lazım gəlmədi. Cəmi ilyarım sonra - 2008-ci ilin isti avqustunda Kreml suveren Gürcüstana qarşı hərbi müdaxiləyə əl atdı. Beləcə, SSRİ-nin süqutundan sonra Rusiya faktiki olaraq ilk dəfə, açıq formada «geosiyasi xuliqanlığa» cürət etdi, ABŞ hegemoniyasına qarşı bir yoxlanış testinə cəsarətləndi.