Millət vəkili Fəzail İbrahimli isə hesab edir ki, hazırda Abşeron rayonu sosial-iqtisadi baxımdan kifayət qədər inkişaf edir, əsas məsələ bu rayonun tabeçiliyində olan bölgələrin şəhər və ya kənd olması deyil, o bölgələrə qoyulan vəsaitin təyinatı üzrə istifadəsidir: «Kəndi şəhərə çevirməklə heç nə dəyişmir. Məgər  şlyapanı dəyişəndə adamın mahiyyəti dəyişir? O ki qaldı kəndə qəsəbə statusunun verilməsinə, bu yerli icra hakimiyyəti tərəfindən edilən təklif əsasında həyata keçirilməlidir. Yerli camaat bununla əlaqədar icra hakimiyyətinə müraciət ünvanlanmalı, icra hakimiyyəti bu mövzu ilə bağlı əhalinin iclaslarının protokolundan çıxarışı Prezident Administrasiyasının müvafiq şöbəsinə təqdim etməli, həmin şöbədə bu məsələ müzakirə olunduqdan sonra Milli Məclisin müvafiq bölmələrinə, sonra isə plenar iclasa çıxarılmalıdır. Milli Məclis qanun qəbul edən orqandır, administrativ qurum deyil ki, təklif versin».