Kremlin Abxaziya və Cənubi Osetiyanı Gürcüstandan qoparması kimi Krımın hazırkı ilhaqı və Ukraynanı parçalamağa yönəlik səylərinin arxasında düşünülmüş və ardıcıl bir strategiya izlənməkdədir. Bu strategiya postsovet məkanını yeni imperiya yoluna döndərməyə hesablanmış təzədən formatlaşdırmanın lokal hədəfləri ilə məhdudlaşmır, daha qlobal və iddialı geosiyasi məqsədlər güdür.

SSRİ-nin bərpası və ya Avrasiya İttifaqı yaratmaq bəhanəsi ilə Rusiya indi açıq şəkildə öz neoimperiya planlarının reallaşmasına girişib və az qala hamıdan özünün aşırı geosiyasi ambisiyalarının susquncasına tanınmasını tələb etməklə Rusiyanı müasir dünyanın ikinci qütbü elan eləməyə tələsir.