Coğrafiya İnstitutu bu yaxınlarda Bakının sərhədlərini genişləndirmək təklifiylə çıxış edib. İnstitutun Azərbaycan əhalisi və sosial inkişafı coğrafiyası şöbəsinin elmi işçisi Etibar Bədəlov hesab edir ki, Bakı ətrafında kənd rayonu olaraq fəaliyyət göstərən Abşeronun və bu rayonun kəndlərinin statusu dəyişilməli, yaxud bu rayon ləğv edilərək paytaxtın tərkibindəki şəhər tipli rayonlara paylanmalıdır.

Etibar Bədəlovun fikrincə, böyüməkdə olan bir çox qəsəbələrin statusunun dəyişməyəcəyi təqdirdə gələcəkdə Böyük Bakının inkişafı planının həyata keçirilməsində problemlər yaranacaq. «Gündəlik Teleqraf» qəzeti yazır ki, «Böyük Bakının inkişaf planı»na görə, 2030-cu ilədək paytaxtda adambaşına düşən yaşayış sahəsi 17 kvadrat metrdən 25 kvadrat metrə çatdırılacaq.