Sonra İTY Birliyinin sədr müavini Rövşən Ağayev «İqtisadi şaxələnmə siyasəti: iqtisadiyyatda və idarəetmədə dəyişikliklər» mövzusunda məruzəsini müzakirəyə təqdim etdi. Çıxışa iqtisadi şaxələnmə sahəsində hökumətin bəyan etdiyi prioritetlərin sadalanması ilə başlayan məruzəçi qeyd etdi ki, iqtisadi şaxələnmə sahəsində uğur qazanmış ölkələrin təcrübəsi belə sahədə əməli nəticələr əldə edilməsi üçün 15-20 il müddət lazım olmasını göstərir: «Azərbaycan hökuməti bu istiqamətdə siyasətini son 4-5 ildə bəyan etsə də, hələ də bu siyasətin dəqiq hədəflənmiş məqsəd nəticələri və çərçivələri yoxdur. Bu, yaradılan institutların işində də özünü büruzə verir».